Էջմիածին համայնքի ղեկավար Դիանա Գասպարյանը աշխատանքային հանդիպում է ունեցել Ֆրանսիա-Հայաստան առևտրաարդյունաբերական պալատի գործընկեր «Արտերայ» ընկերության ներկայացուցչի հետ: 
Ընկերությունը ծառայություններ է մատուցում տրանսպորտային ցանցերին եւ երկաթուղային օպերատորներին եւ մշակել է Երևան-Զվարթնոց օդանավակայան կապուղի կառուցելու ծրագիր. տեխնիկատնտեսական ուսումնասիրություններն արդեն իսկ արված են: 
Ծրագրի ընդլայնման շրջանակներում հանդիպման ընթացքում կողմերը քննարկել են Զվարթնոց օդանավակայանը Էջմիածնին միացնելու հնարավոր տարբերակները: 
Առաջարկը մոտ օրերս կքննարկվի Կառավարության պատասխանատու գերատեսչության հետ:

Ամառային բակային ճամբարների մեկնարկը տրված է:
Առաջին կանգառը Զվարթնոց թաղամասի նորաբաց խաղահրապարակն էր: 
Ինչպես նախօրոք տեղեկացվել էր` ճամբարն անցկացվեց երեք փուլով: Առաջին փուլում երեխաները հանպատրաստից երգեցին, պարեցին եւ ասմունքեցին: 
Երկրորդը խաղային` միմյանց հետ մրցելու, սեփական ուժերը չափելու փուլն էր, որից անմասն չկարողացան մնալ նաեւ մեծերը, ովքեր երբեմն միանում էին երեխաներին: 
Մանկական դիսկոտեկով էլ ամփոփվեց ուրախ ու հագեցած երեկոն: 
Բակային ճամբարի հաջորդ կանգառը Չարենց թաղամասն է: 

Էջմիածնի քաղաքապետարանում էին հյուրընկալվել «Կանանց իրավունքների տուն» հասարակական կազմակերպության 25 ներկայացուցիչ: Հանդիպումը կայացավ «Կանանց տեղը քաղաքականությունում է» ծրագրի շրջանակում, որտեղ քաղաքապետ Դիանա Գասպարյանը հանդես եկավ որպես բանախոս:
Հանդիպման ընթացքում Դիանա Գասպարյանը մասնակիցներին ներկայացրեց քաղաքապետի իրավասությունների շրջանակն ու գործառույթները, քաղաքի զարգացման տեսլականը ու նախատեսված ծրագրերը: 
Քաղաքապետը պատասխանեց նաեւ մասնակիցների բազմաբնույթ հարցերին, որոնք վերաբերում էին ինչպես քաղաքական դաշտին, այնպես էլ նրա` որպես առաջին կին քաղաքապետ լինելու առավելություններին եւ դժվարություններին:
Մասնակիցները հանդիպումն ամփոփեցին խմբակային լուսանկարով: